يبقى انت أكيد في مصر

السلام عليكم و رحمة الله و بركاته

لما الشعب كل اللي يحركه العاطفة...يبقى انت أكيد في مصر

لما خطاب يخلي نص الناس تعيط و تتراجع عن قرارات مهمة خدتها...يبقى انت أكيد في مصر

لما في أحلك المواقف الناس تطلع تهزر و تقول "من النهاردة مفيش حكومة، أنا الحكومة"...يبقى انت أكيد في مصر

لما الجار يخاف على جاره زي لما بيخاف على أهل بيته...يبقى انت أكيد في مصر

لما الشباب يكوِّنوا لجان شعبية منظمة جدًا للحفاظ على أمن بيتهم و أموالهم و أهلهم...يبقى انت أكيد في مصر

لما جار يجيب عيش لكل العمارة عشان احتمال يكونوا محتاجين و مش قادرين ينزلوا يجيبوا و حتى ميرضاش ياخد فلوسه...يبقى انت أكيد في مصر

لما الشباب الجامعي و آباءهم ينزلوا ينظفوا أمام بيتهم...يبقى انت أكيد في مصر

لما الحكومة تسيب الأمن و المرور و نقدر ناخد مكانها...يبقى انت أكيد في مصر

لما مع أول خطر التليفون ميبطلش رن من الناس اللي بتطمن عليك...يبقى انت أكيد في مصر

لما تسمع الجامع بينادي على أولاده و يحثهم على الثبات...يبقى انت أكيد في مصر

لما يكون في مقاومة شعبية و الناس سهرانة في عز البرد و بيلعبوا كرة قدم...يبقى انت أكيد في مصر

بس لما تلاقي أهل بلدك بيضربوا في بعض

لما تلاقي في ظلم و فساد و عدم حرية

لما تلاقي الناس بتموت أمام عينك

يبقى ساعتها أكيد في حاجة غلط بتحصل، يبقى أكيد مش بس المصريين اللي فيها أو بمعنى أصح مش بس الوطنيين

يا ريت نستوعب إن فيه رأيين

ناس مش راضية ان الرئيس بتاعها يمشي بإهانة

و ناس شايفة إن الفساد اللي حصل مايحتملش غير إنه يتنحى الآن

و لازم نحترم بعض، حتى و إن اختلفنا

ماينفعش يكون الناس في ميدان التحرير بيهاجموا بعض

افتكروا: كلنا مصريين و كلنا هدفنا نحو مصر أفضل

و كلنا عاوزين نعيش عيشة أفضل

و لو فعلًا في ناس مندسة أو تدخل من أي نوع زي ما كلنا حاسين

يبقى نتراجع حتى ينفضوا و نرجع تاني

عشان نحافظ على نفسنا

و نحافظ على بلدنا مصر

بغض النظر عن كل الأحداث الحالية

بجد  فخورة إني مصرية

ربنا يسَلِّم بلدنا من كل سوء و من كل خطر و يحفظ أهلها جميعًا

ربنا يرزقنا بالحاكم الصالح الحكيم و العادل

ربنا يعيد علينا الأمن و الاستقرار...بجد نعمة و كنا بننسى نشكر ربنا عليها

رَبِّ اجْعَلْ هَـٰذَا بَلَدًا آمِنًا وَارْزُقْ أَهْلَهُ مِنَ الثَّمَرَاتِ مَنْ آمَنَ مِنْهُم بِاللَّـهِ وَالْيَوْمِ الْآخِرِ